LAOAG CITY – Naikkan ti bileg ni Gov. Matthew Marcos-Manotoc a mangibagi iti Provincial Government of Ilocos Norte (PGIN) a sumrek iti “Deed of Donation” ken mangawat iti maysa a unit ti “motor vehicle” nga idonar ti konsulada ti Peoples Republic of China ditoy siudad ti Laoag.
Daytoy ket kalpasan ti panangipasa ti Sang. Panlalawigan iti resolusyon iti babaen ti temporary presiding officer a ni Senior Sang. Panlalawigan Member Rafael Chua Medina.
Nupay kasta, iti agdama ket saan pay a naammoan no kaano a maiyawat ti nasao a motor vehicle ken no mismo a ni Acting Head Consul Mr. Sun Weidong wenno adda ti sabali nga opisial ti Chinese Consulate a mangiyawat iti nasao a donasyon.
Immun-una ngem iti daytoy, inlawlawag ni Atty. Franklin Dante Respicio, chairman ti committee on laws iti Sang. Panlalawigan a ti nasao a lugan ket mabalin nga usaren dagiti nagduduma a pangopisinaan iti gobierno probinsyal para iti panangipaayda ti serbisio kadagiti umili.
