LAOAG CITY – Linawlawagan ni Gov. Imee Marcos ti gagem ti gobyerno probinsiyal a mangatipa kadagiti traders a mangilako kadagiti apit nga irik iti ruar ti probinsiya.
Segun ken ni Marcos, awan ti bileg da tapno atipaen da dagiti traders iti panagnegsoyo da ngem kidkiddawen da laeng kadagitoy a no mabalin ket saan pay laeng a rumuar dagiti apit nga irik ditoy probinsiya agingga nga adda ti umdas a supply ti bagas para iti probinsiya.
Kuna na nga awan pay ti napagsasaritaan no mano ti panggatang ti probinsiya isu nga iyuray da ti resulta ti maisayangkat a public hearing.
Inlawlawag ti gobernador nga anianto man ti resulta na ket isunto met ti pagibasaran iti sumaruno nga addang nga aramiden da.
Innayon ti gobernador a narigat a panunuten a maawanan ti probinsiya ti supply a bagas idinto a naruay ti apit nga irik dagiti agtaltalon.
