LAOAG CITY – Nabakunaanen kontra iti covid-19 ni Gov. Matthew Marcos Manotoc ken dagiti 12 a mayor usar ti Sinovac vaccine.
Naiyuswat ti panagbakuna dagiti opisyal iti Gov. Roque Ablan Senior Memorail Hospital ditoy ciudad ti Laoag itay laeng bigat.
Segun kenni Dr. Walber Samonte, ti Hospital Administrator ti GRASMH, dagiti mayor a nabakunaan ket manipud iti ciudad ti Laoag ken Batac ken iti ili ti Pagudpud, Bacarra, Nueva Era, Banna, Marcos, Currimao, Paoay, Solsona, Pinili ken Badoc.
Basar iti Advisory No. 26 ti National Vaccination Operations Center (NVOC) nga inaprubaran ti national IATF for the Management of Emerging Infectious Diseases, sumagmamano a local chief executives ket karaman iti listaan no sadinno a ti lugar da ket maibilang a critical wenno high-risk areas iti COVID-19.
Maipalagip a nagkari ni Gov. Manotoc a no maipalubos kadakuada nga opisyal ti gobierno ket dagus nga agpabakuna tapno agtalek ti publiko nga agpabakuna.
