LAOAG CITY – Naisayangkat ti kaunaan a consultation visit ni Gov. Matthew Marcos Manotoc iti ili a San Nicolas.
Ditoy a napagnunumoan dagiti kalikagum a maipatungpal ken masansan a mapaspasaran a problema dagiti mangisursuro kadagiti pagadalan iti nadakamat nga ili.
Kalikagum dagiti mangisursuro ti sekundarya iti ili a San Nicolas a mairaman isuda ti “Kuryente Mo, Sagot Ko Program” gapu ta saan da a nairaman itay napalabas a tawen.
Segun kenni Manotoc, agtultuloy ti nasao a programa ngem saan na a sakupen dagiti pagadalan ti sekundarya.
Inbatad na nga addaan ti 318 a pagadalan iti elementarya ti mabenbenipisyaran iti nadakamat a programa ti gobierno probinsial.
Nagkiddaw pay dagiti mangisursuro iti gobernador nga agbalin a 21st Century Classroom dagiti classroom.
Maipalagip a ti Burgos Agro-industrial School ken Burgos Central Elementary School iti ili a Burgos laeng ti addaan ti 21st Century Classroom iti intero a probinsyaken addaan da ti 4 a computer desktop, 50 a tablets, robotic kits, 10 units ti mini drones, 3D filament, 3D printer, interactive projectors, camera ken Wi-Fi connections.
Kabayatanna, nabinsabinsa dagiti problema ken kalikagum dagiti nagduduma a grupo kas iti pannakaipaay kadagiti mannalon ti Rice harvester, Combined Rice harvester, Traktor, Rice Transplanter.
Karaman pay kadagitoy ket dagiti grupo ti transportasion, fisher folks, Barangay Health Workers, Senior Citizens, 4P’s, Day Care Workers, Barangay Officials ken Religious groups.
