LAOAG CITY – Maawatenen ni Gov. Matthew Marcos Manotoc ditoy probinsia ti Ilocos Norte no apay a nauman ti ina na a ni Senador Imee Marcos ken ti uliteg na a ni Presidente Ferdinand Marcos Jr. a suportaran ni Mayor Michael Marcos Keon ditoy siudad ti Laoag.
Segun iti gobernador, saan a nasayaat nga agtrabaho ken kasarsarita ti uliteg na a mayor ditoy siudad.
Kinunana a saan na nga ammo no asinno ti mangsupsuporta iti Mayor sipud ta agbukbukod daytoyen.
Mainaig iti daytoy, kuna ni Manotoc a ti laeng kayat ti pamilia Marcos ket ti nasayaat ken naurnos a kasarsarita nga indibidual.
Nupay kasta, inpaganetgetna a nasingpet ti mayor ngem no adda ti gundaway nga ag-panic ti mayor ket agtrabaho daytoy nga agmaymaysa kas idi 2019 ken 2022 elections.
Dinakamat ni Manotoc a nabayagen a saanda a nagsarita ken awan ti interesna a makisarita ken ni Keon gapu iti maysa nga insidente iti napalabas nga eleksion, a nangipatulod daytoy ti mensahe iti biang ti ulitegna no sadinno rumrummuar a nga agpapabiktima laeng ti mayor.
Innayonna ti naudi a panagsarita da ket maipanggep iti narugit a swimming pool iti Marcos stadium ken sumagmamano a proyekto para ditoy siudad.
Segun ken ni Manotoc, no maipapan iti panagdur-as ti lokal a gobierno ket maud-udin ti siudad ti Laoag no idasig kadagiti sumagmamano nga ili ken siudad ditoy probinsia.
Maipalagip a namunganay ti tension kalpasan a mamati ni Mayor Michael Marcos Keon nga adda ti maris pulitikana iti maipagarup a panangsabotahe ti Provincial Government of Ilocos Norte kadagiti aktibidad ken programa ti City Government.
Kabayatanna, nagtalinaed ti takder ti gobernador a nasken ti panagkaykaysa para iti panagdur-as ti probinsia.
