LAOAG CITY – Inbasa ni Governor Cecilia Araneta Marcos ti personal nga insuratna a poem maipanggep ti arapaapna ditoy probinsia iti State of the Province Address-na.
Nakaipalaon iti nasao a poem ti maipanggep kadagiti agtutubo nga uray man pay sadinno ti naggapuanda ket awan ti patingga ti arapaapda gapu iti kalikagumda nga agballigi iti biagda.
Segun kenkuana, dagiti ubbing nga aggapo kadagiti barangay ket maipaayan ti kapada nga oportunidad nga adda ti poblasion tapno makabasa ken agballigi iti biagda.
Malaksid iti daytoy, nadakamat pay iti poem-na dagiti mannalon ken mangngalap.
Dinakamat na pay ti napintas a trabaho dagiti amin a residente ditoy probinsia a saandan a kasapulan ti umadayo iti pamiliada ken ti pannakaipapintas dagiti pasilidad para iti salun-at ken edukasion a para iti amin ken ti natalged nga aglawlaw.
