LAOAG CITY – Kalikagum ni Gob. Matthew Marcos-Manotoc a manayunan ti pension dagiti senior citizen nga ipapaay ti probinsia.
Segun kenkuana, bassit unay ti tallo ribu a pisos nga aw-awaten iti kada senior citizen.
Mainaig iti daytoy, binilinna ni Mrs. Rochelle Gajes, Officer In-charge ti Provincial Social Welfare Office wenno PSWDO a mangbiruk iti mabalin a pangalaan ti mainayon a pondo.
Inlungalongna ti panagpatulong ti Provincial Social Welfare Office iti gobierno nasional tapno maipangato ti pension nga ipapaay ti probinsia kadagiti senior citizens.
Naammoan a ti tallo ribu a pisos nga immunna nga inpaay ti probinsia ket pension iti kada senior citizen para iti uneg ti innem a bulan.
Inbunannag ni Gajes a dagiti kaudian nga immawat ti pensionda a senior citizen ket agpapada a taga ili ti San Nicolas.
