LAOAG CITY – Agtultuloy a maag-agasan ti babai nga agtawen ti siyam kalpasan a nadungpar ti motorsiklo iti Brgy. 11 Bulbulala iti ili ti Vintar.
Ti biktima ket maysa a Grade 3 pupil ken residente iti nasao a lugar idinto a ti driver ti motorsiklo ket ni Rex Saguid y Aguinaldo, agtawen ti 42, naasawaan ken residente iti Sitio 1, Brgy. 14 Ester iti nasao nga ili.
Basar iti imbestigasyon ti PNP Vintar, bayat nga agpapaamianan ti motorsiklo nga inturong ni Saguid idi kalman iti agarup alas-singko y media ti malem iti Brgy. Bulbulala ket kellaat a bimmallasiw ti menor de edad.
Gapu iti daytoy ket nadungpar ni Saguid ti ubing anangitunda ti pannakatukkol ti akin kannigid a saka na ken nasugatan ti sumagmamano a paset ti bagi na.
Dagus a naitaray da iti Governor Roque Ablan Sr. Memorial Hospital ditoy siudad ti Laoag.
Agtultuloy ti imbestigasyon ti PNP Vintar kalpasan ti aksidente.
