LAOAG CITY – Pimmusay ti maysa a Grade 8 student kalpasan a nagbekkel iti mismo uneg ti pagtaenganda iti ili ti San Nicolas.
Basar iti San Nicolas Municipal Police Station, nabigbig ti biktima nga agtawen iti 15, lalaki ken residente iti nasao a barangay.
Maibasar iti naiwayat nga imbestigasion, manarimaan ti panagsagsagana ti biktima ken ti buridek a kabsatna a sumrek iti pagadalan ngem pinaunana ti kabsatna a mapan agbasa.
Nupay kasta, naammoan nga apaman a nakatalawen ti kabsatna ket ditoy a maipagarup nga inaramidna ti panangkettel ti bukudna a biag babaen ti nylon.
Mainaig iti daytoy, basar kadagiti otoridad agarup 10:30 ti bigat ita nga aldaw ket napan iti pagtaengan ti bayaw ti biktima tapno sundoen koma dagitoy ngem maysa a nalamiisen a bangkay idi nadanonda.
Kabayatanna, rumrummuar iti imbestigasion a sumangsango iti problema ti pamilia ti biktima no sadinno addan ti immuna a pananggandatna nga agpakamatay ngem nalappedan ti inana.
