LAOAG CITY – Positibo ti nagbalin a search operation iti pagtaengan ni Mr. Simplicio Velasco y Agtalon, adda iti legal nga edad, naasawaan iti Sitio Ducawa, Barangay Loing iti ili ti Piddig.
Nakumpiskar iti pagtaengan ni Velasco ti maysa a granada, innem a bala ti 9MM ken maysa a bala ti armalite.
Ummuna iti daytoy, naiyuswatan ti operasyon ni Velasco gapo iti maipagarop a panagikot na ti granada, cal. 38 ken cal. 45 a paltog.
Segun kenni Police Chief Master Sergeant Prospero Tabangcura, iti impormasyon a naipadanon kadakuada ket adda ti makarirriri ni Velasco iti lugar da rason nga adda dagiti gundaway nga ipakpakita na ti paltog ken ti iggem na a granada.
Malaksid iti daytoy, kuna ni Tabangcura nga adda dagiti reports iti maipagarop a panangraot ni Velasco iti maysa a balay ken rumrumwar nga adda ti armas na nupay saan na nga inpakita kabayatan ti panagkarit na.
Inbatad pay ni Tabangcura a no makin-inom ni Velasco ket adda dagiti gundaway a makiriri kadagiti kakadwa na.
Kunana nga uray awan ti subject iti mismo a pagtaengan na idi naiysuwat ti operasyon ket maipila latta kas regular filing ti kaso na.
Kabayatanna, kuna ni Acting Barangay Chairman Joaquin Triofante iti nasao a barangay nga awan met ti rekord ni Velasco iti barangay da.
Nupay kasta, inbatad na a masdaaw isuna idi nakita na a mismo ti granada iti balay ni Velasco.
