LAOAG CITY – Balligi ti nagbalin a search warrant operation dagiti kameng ti PNP-Badoc iti pagtaengan ni Mr. Rolando Pascua y Pascua a.k.a Bobot iti Barangay Alay iti nasao nga ili.
Nakailanad iti search warrant a ti biruken dagiti otoridad ket dua nga M16 riflle, maysa a kalibre 45 a paltog ken bala dagiti nadakamat a paltog.
Nupay kasta, ti naukag ti search team ti maysa a hand grenade, maysa a magnun 22 revolver ken dua a bala na, maysa a short magazine ti M16 riffle nga addaan ti 19 a bala a nakaipan iti medyas nga adda iti durabox iti kwarto ti kasinsin ni Pascua.
Segun kenni Police Captain Joseph Tayaban, chief of police ti PNP-Badoc, adda dagiti maaw-awat da a reklamo iti nasao a barangay ken iti kabangibang a barangay mainaig iti panagpapaputok ti paltog ni Pascua.
Inbatad na nga awan met ti ebidensya da a mangtiliw kenni Pascua agingga nga adda ti kabarangayan ti maseknan na a nagreport ken na-validate ken nagaplikar da ti search warrant.
Malaksid iti report a maipagarop a panagpaputok ni Pascua ti paltog ket rumrumwar a nakidinnanog pay daytoy iti brgy. Tanod iti Barangay Bato ken saan a nagsardeng iti checkpoint iti Brgy. Ar-arusit iti nasao nga ili.
Kuna pay ni Tayaban a rumrumwar nga agus-usar ti droga ni Pascua ngem awan ti pammaneknek iti daytoy.
Naamoan a ni Pascua ket naggapo idiay Hawaii ngem gapo iti kinaluko na ket nagsubli ditoy Pilipinas.
Mainaig iti daytoy, naiget a naglikudan ni Pascua a nagpappaputok ti paltog ken kunana a saan pay a naka-iggem iti anyaman a klase ti paltog.
Inlawlawag na a napabasol laeng isuna idi a nagpaputok ti paltog iti Barangay Bato iti nadakamat met laeng nga ili.
Inbaga met ti lolo ni Pascua nga uray naluko ti apoko na ket patyen na nga awan ti ik-ikotan daytoy a paltog ken eksplosibo.
