LAOAG CITY – Balligi ti pannakaiyuswat ti Ground Breaking ti 29.952 Megawatts Nueva Era Solar Farm a masarakan iti Barangay Poblacion iti ili ti Nueva Era.
Segun ken ni Mayor Aldrin Garvida iti nasao nga ili, daytoy ket maibilang kas First Battery – Embedded solar farm iti intero a pagilian a Pilipinas.
Inbatadna a daytoy a landmark project ket nagbibinnuligan ti Japan, Malaysia, Germany, China ken ti Pilipinas kangrunaanna ti Sineng, Looop ken AESOLAR.
Kunana a daytoy a programa ket inimatangan ti Looop Energy Malaysia Managing Director Ong Chin Wei, ti General Manager ti Renewable Energy Division ti Looop Japan Keiya Kojima, ti Sales VP ti AE Solar Germany Waldemar Hartman, ti Ilocos Norte Electric Cooperative Board of Director Atty. Nick Malasig, iti National Electrification Administration a ni Atty. Nikki Pilar, ti Acting General Manager ti INEC a ni Mr. Cipriano Martinez III, dagiti INEC Board of Directors ken dadduma pay no sadino nagatendar pay dagiti sumagmamano nga opisial ti probinsia.
Inlawlawagna a saan laeng a dagiti residente iti ili ti Nueva Era ti mabenipisiaran no di ket iti intero nga Ilocos Norte babaen iti pannakaipababa ti singir ti kuriente ditoy probinsia.
Mainaig iti daytoy, inpakaammo ni Mayor Garvida nga ipaay ti AESOLAR ti panel, ti Japan ti mangipaay ti teknolohia iti baterya pakairamanan pay ti tulong manipod iti dadduma pay a pagilian.
Innayonna a maikkan ti 40 a porsiento para iti barangay, 30 a porsiento iti lokal a gobierno ken iti probinsia apaman a maipatungpal ti dakkel a proyekto.
Kabayatanna, naammoan nga adda ti 11 a barangay iti ili ti Nueva Era.
