LAOAG CITY – Inkiddaw ni Mr. Danver Dela Cruz, Focal Person ti Regional Agricultural Fishery Council iti National Food Authority – Regional Office I ti 25 a pisos iti kada kilo a presio ti panangilakoda ti irik.
Nupay kasta, inbatadna a marigatan ti nasao nga ahensia ti gobierno iti inrekomendarda a presio a pannakailako ti irik dagiti padana a mannalon.
Kunana a daytoy ti kangrunaan nga arungaing dagiti padana a mannalon isu a mangnamnamada a mangaramid ti wagas ti gobierno tapno matulongan isuda ken masolbar daytoy nabayagen a parikotda.
Inlawlawagna a saan nga umdas ti ipapaay ti gobierno kadakuada kas kadagiti bukbukel, abono ken dadduma pay gapu ta agtultuloy ti panagngato ti presio dagiti kangrunaan a magatgatang.
Kabayatanna, ibilang ni Dela Cruz a ti 20 a pisos iti kada kilo ti bagas nga ipatungpal ti gobierno inton sumaruno a lawas iti Visayas ket kurang para kadagiti adu ti miembro iti pamiliana.
