LAOAG CITY – Mangiparuk-at ti Government Service Insurance System (GSIS) ti nasurok a P19 bilyon kas loan refunds para iti 1.37 milyon a miyembro ken pensioners iti babaen ti Balik Ginhawa program.
Ti refund ket katukad ti agingga iti tallo a bolan nga amortizations a maisubli kas lump sum.
Inlawlawag ni GSIS President ken General Manager Wick Veloso nga al-alisto ken ad-adda nga epektibo ti nasao a programa no ikompara iti tradisyunal a moratorium gapu ta imbes a masuspenso ti bayad, maisubli a dagus ti tallo a bolan nga amortizations kas lump sum.
Kuna na a gagaem daytoy a maipaayan a dagus ti tulong pinansyal dagiti miyembro iti oras a dagitoy ket agkasapulan unay.
Nupay kasta, inlawlawag ti Government Service Insurance System a dagiti laeng miembro ken pensioners a nagbayad ti loan iti nasao a panawen ti makaawat ti refund.
