LAOAG CITY – Nagreklamo ditoy Bombo Radyo Laoag ti guardian ti maysa nga estudyante iti Saint Joseph Institute iti ili ti Dingras gapu ti maipagarup a panagsasao iti dakes ken madi a sarita ti maysa a mangisursuro kadagiti estudyante na.
Segun iti saanen a nagpabigbig a guardian, naipadanon kenkuana a saan a simsimrek iti pagadalan ti kasinsin na kalpasan ti maipagarup a panangibagbaga ti mangisursuro a nabigbig a ni Ms. Franzel Joen Molina ti naalas a sarita kas iti “bobo” “tanga” ken dadduma pay iti sangoanan dagiti ado nga estudyante.
Inbatad ti guardian a basar iti inpakaammo kenkuana dagiti kasinsin na ket masansan nga ibaga ni Molina dagiti agkakadakes a sarita kadagiti estudyante.
Kabayatanna, kuna ti guardian nga adda ti gundaway a naluko dagiti estuyante kas iti kasinsin na.
Nu pay kasta, inbunannag na a saan a rumbeng nga agkakadakes a sarita ti ibalikas ti mangisusuro kadagiti estudyante na gapu ta naalas a wagas daytoy iti panagdisiplina.
Inpetteng na a saan a rumbeng a maipanggeg iti publiko ti panangadal iti estudyante nangruna nu naalas a sarita ti maibalikas.
Immuna iti daytoy, dinakamat ti guardian a maipagarup a kanayun pay a pagsasao ni Molina nga awan ti kabutbuteng na uray kenkuan nga agpapaay iti senado ken adda ti bukod na nga abogado.
Mainaig iti daytoy, kuna ti guardian a desidido a mangipila ti kaso kontra iti mangisursuro.
