LAOAG CITY – Inparuk-aten ti Hamas ti nagan dagiti tallo nga hostages da a naituding a waya-wayaan da ita nga aldaw kasukat ti pannakawaya-waya met ti Israel kadagiti Palestinian prisoners.
Nabigbig dagiti mawaya-wayaan nga hostages ti Hamas nga isuda Russian-Israeli Alexander Troufanov, Argentine-Israeli Yair Horn, ken US-Israeli Sagui Dekel-Chen.
Immunan a nagpangta ti Israel nga itultuloy da ti mangbomba iti ayan dagiti Hamas no saan a mawaya-wayaan iti naibaga nga oras dagiti tallo nga hostages da.
Inaramid daytoy ti Israel kalpasan a nagballaag ti Hamas a possible nga iyalud-id da ti pannakawaya-waya dagiti tallo nga hostages gapu iti maipagarop a panaglabsing ti nadakamat a pagilian iti ceasefire.
Maipalagip nga inrakurak pay ni US President Donald Trump a masapol a masuspenso ti ceasefire no saan a tungpalen ti Hamas ti mangwaya-waya kadagiti hostages da iti Gaza ita nga aldaw.
