LAOAG CITY – Kinontra ti Hamas ti panawagan nga ikkaten dagiti armas dagitoy.
Segun ken ni Hamas political leader Khaled Meshaal, no ikkaten dagiti armas kadakuada ket alisto laengen a papatayen isuda ti Israel.
Inbatadna a nakasaganada nga agtungpal iti total ceasefire ngem aglablabsing met iti daytoy ti Israel.
Kidkiddawenda ti alisto a pannakaiyurnos iti Gaza gapu iti nakaro a pannakadadaelna gapu iti panangatake ti Israel.
Maipalagip a sumagmamano a pagilian kas iti Qatar, Turkiye ken Egypt ti nagtitinnulong tapno maaddaan ti nakappia a panagsinnarita iti nagbaetan ti Hamas ken Israel.
Indauluan ti Estados Unidos ti panagsinnarita ti dua a grupo no sadinno agpada nga immannugot ti Hamas ken Israel nga agsinnukatda kadagiti hostage-da ken ti panaglukat ti Rafah crossing.
