LAOAG CITY – Narekobre ti maysa a lalaki ti maysa nga hand grenade iti igid ti karayan iti paset ti Barangay 6, San Juan Bautista iti ili ti San Nicolas.
Nabigbig daytoy a ni Jayson Mamuad y Dumayas, agtawen ti 34, baro, Liason Officer iti maysa a Travel Agency ken residente met laeng iti nadakamat a barangay.
Segun ti report, kabayatan ti panagal-alad ni Mamuad iti asideg ti karayan ket nakita na ti nabungon nga hand grenade iti igid ti Padsan River.
Dagus a napan inreport ni Mamuad iti PNP ti nakita na ken manamnama a maiturnover daytoy iti Explosive Ordnance Device-INPPO.
Kabayatanna, inbatad ti PNP-San Nicolas a possible a nabayagen a naipan ti hand grenade iti lugar ken dakkel ti posibilidad na a bumtak no adda ti makadalapos iti daytoy.
