LAOAG CITY – Mairubuat ditoy Ilocos Norte iti ili ti Adams ti “Hapag Katutubo Project” ti National Commission on Indigenous People wenno NCIP.
Inpakaammo ni Indigenous Peoples Representative Cheryll Bromeo Tabangay iti Sangguniang Panlalawigan a karaman kadagiti maisayangkat nga aktibidad ti ritual ti tribu nga isnag yapayao, tree planting kangrunaanna ti niyog ken panagmula pay ti nagdumaduma a klase ti natnateng ken ti serbisyo fair.
Kunana a ti serbisyo fair ket pagbibinnuligan dagiti nagdumaduma a National Government Agencies a dakkel a tulong kadagiti isnag yapayao iti nadakamat nga ili.
Inlawlawagna a maigiddan pay a maisayangkat iti Memorandum of Agreement Signing iti nagbabaetan dagiti nadakamat nga ahensia.
Inbatadna nga awan ti pagdanagan dagiti dadduma pay nga Indigenous People ti ilocos norte agsipud ta maisaruno ti pannakaiyuswat ti nasao a proyekto kadagiti bukud dagitoy a lugar kadagiti sumarsaruno nga aldaw.
Nagpanawagan ni Tabangay iti panagan-anus dagiti dadduma a tribu a mangiyuray iti batang dagitoy a pakaisayangkatan ti nasao a proyekto.
Naammoan a sangaribu a kameng ti nasao a tribu ti puntiria a maserbian iti pannakaiyuswat daytoy a proyekto iti ili ti Adams.
