LAOAG CITY – Inpalagip ni Ms. Genalyn Sambrano, Health Education and Promotion Officer iti City Health Office ditoy ciudad ti Laoag ti responsibilidad dagiti adda ti taraken na.
Daytoy ket kageddan ti pannakaobserbar ti Rabies Awareness Month.
Karaman ditoy ti tinawen a panangpabakuna iti taraken kas iti aso, saan a baybay-an nga agkaiwarang iti kalsada gapo ta mabalin a ditoy da a maala met ti rabies, ipalista iti barangay ken mentenaren ti grooming dagitoy.
Segun kenni Sambrano, no met adda ti makagat a tao babaen iti taraken ket ibaklay ti akin-taraken ti magastos kas nakailanad iti Republic Act 9486.
Inlawlawag na a no adda met ti makagat ket dalusan ti mismo a nagakat babaen iti danom ken sabonan ken saan da nga irekrekomendar ti panagpatandok, imbes ket mapan laeng iti City Health Office.
Mainaig iti daytoy, kunana a ditoy ciudad ti Laoag ket rabies free iti napalabas a lima a tawen ngem adda latta dagiti mairekrekord da nga animal bite.
Kinupirmaran na pay nga adda ti maysa a kaso no sadinno ket nagpositibo iti rabies ti aso.
