LAOAG CITY – Inlawlawag ni Dr. Alan Taylan, ti St. Camillus De Lellis Hospital ti maipanggep iti tuklaw cigarette a maaw-awagan kas black cigarette idiay Vietnam no sadinno a maysa daytoy a variant ti sigarilio a tabako.
Segun kenkuana, no ti sigarilio ditoy pagilian ket dumanon iti maysa agingga iti tallo a porsiento ti nicotine content-na idinto a ti tuklaw cigarette ket dumanon iti siam a porsiento.
Inbatadna a ti epekto ti nicotine content iti maysa nga indibidual ket mabalin a makarikna ti panagngato ti blood pressure, pannakaulaw, panaglamming, panagtegerger ken dadduma pay.
Kunana a no agkissiw wenno agamangaw ti maysa nga indibidual kalpasan a nagusar ti tuklaw cigarette ket mamati a posible nga adda ti nailauk a sabali iti daytoy.
Mainaig iti daytoy, inpakaammo ni Dr. Taylan a dakkel ti epekto iti salun-at dagiti indibidual a makaangot iti asok ti tuklaw cigarette.
Innayonna a no bilang nga itultuloy ti maysa nga indibidual ti panagusar ti tuklaw cigarette ket mabalin a makapasar ti kidney failure ken heart attack a mangitunda ti pannakatay dagitoy.
