LAOAG CITY – Nagtipon ti pintas, sirib ken fashion iti baro a tambalan da Heart Evangelista ken Catriona Gray iti ay-ayam a pickleball.
Iti Instagram Stories, inburay ni Heart ti sumagmamano a ladawan ken maysa nga ababa a bidyu no sadinno a makita a seryosoda nga agen-ensayo kaduana ti beauty queen a ni Catriona iti baro nga sport.
Makita pay ti sporty ken stylish dagitoy a naka-OOTD kabayatan nga agay-ayam.
Iti kallabes, kaay-ayo ni Heart ti pickleball, maysa a patok a racket sport. Malaksid iti panangipakitana ti laingna iti court, saan met a nagpaudi ti Sparkle star iti panang-flex ti fashion iti sportswear.
Kaaw-awid laeng ni Heart manipud idiay Dubai kalpasan ti panangawatna ti pammadayaw kas Global Fashion Influencer of the Year iti 2025 EMIGALA Awards.
Iti panagbisitana, nagkitada ti sikat a Filipino fashion designer a ni Michael Cinco ken nangrukud ti sumagmamano a couture pieces.
Kabayatanna, kasubsubli laeng ni Catriona manipud iti maysa nga European trip kaduana ti padana a beauty queen a Nicole Cordoves.
Nagkadua a naglikos ti dua idiay Sweden, Switzerland ken Denmark.
