LAOAG CITY – Madanagan ni Dr. Alan Taylan, ti St. Camillus De Lellis Hospital ditoy siudad ti Laoag ti panagngato ti bilang dagiti agkidkiddaw ti dialysis procedure gapu iti kidney failure ditoy pagilian.
Segun ken ni Dr. Taylan, ti chronic kidney failure ket maysa a kondision nga in-inut nga agpukaw ti panagsagat iti rugit ti bagi iti bato ti maysa a tao gapu met laeng kadagiti maipapauneg a taraon, mainum ken dagiti matumtumar nga agas.
Inbatadna a ti kellaat a panagngato ti bilang ket mabalin a gapu iti panagadu dagiti tattao a na-diagnose nga addaan ti diabetes ken hypertension.
Inlawlawagna a ti hypertensive cardiovascular disease ken kidney problem ti maysa kadagiti kangrunaan a mangitunda ti chronic kidney failure.
Kunana nga adda ti makunkuna a cardiovascular kidney metabolic syndrome a mapasaran dagiti pasiente.
Maipalagip a basar iti report, ti bilang ti dialysis patients ditoy pagilian ket immulin iti 42% manipod iti 25,125 idi 2022 iti 35,714 idi 2023.
Kabayatanna, nagpalagip ni Dr. Taylan kadagiti amin nga umili nga agbalin a responsable kadagiti ipapauneg a taraon tapno maliklikan a makaala ti aniaman a sakit.
