LAOAG CITY – Dead on arrival ti helper iti maysa a metal works iti Brgy. 19 iti ili ti San Nicolas kalpasan a nagsagaba ti nagduduma a sugat iti bagi kangrunaan iti ulo na gapu iti napasamak a desgrasya iti kurbaan a paset iti nasao a barangay.
Basar iti imbestigasyon ti PNP San Nicolas, agpapaabagatan a direksyon ti mercedes benz nga inturong ti agtawen ti 46, naasawaan, driver ken residente iti Brgy. 50 Buttong idi ta kellaat a simmabat ti motorsiklo iti kurba a paset ti nasao a kalsada ken agpaamianan a direksyon.
Gapu iti daytoy, nagdinnungapar dagiti dua a lugan ken rason a nagderdertso ti mercedes benz iti concrete barrirer idinto a naipurwak iti tengga ti kalsada ti motorsiklo.
Kabayatanna, nadadael a permi ti motorsiklo ken ti sango a parte ti mercedes benz.
Naamoan nga agnanaed iti Brgy. 19 San Nicolas ti pimmusay ngem tubo iti Panacol, Pangasinan.
Maipalagip nga itay kallabes ket maysa ti natay a nangiturong ti motorsiklo gapu iti pannakadesgrasya na iti met laeng nasao a lugar.
