LAOAG CITY – Inpangato ti Philippine Health Insurance Corporation (PhilHealth) ti package rate para iti hemodialysis manipud iti PHP4,000 agingga iti PHP6,350 iti kada session.
Inbatad ti Department of Health (DOH) nga inaprobaran ti PhilHealth Board en banc ti baro a rate a PHP6,350 iti kada session iti kapada a pampubliko ken pribado a dialysis units.
Basar iti Department of Health, mapalubusan dagiti pribado a dialysis unit nga agsingir no adda dagiti serbisio a naipaay a limmabes iti nakalista a minimum a pagannurutan iti salun-at.
Immuna iti daytoy, kinataripnong ni Department of Health Secretary Teodoro Herbosa ti Benefits Committee (Bencom) tapno mangngegan ti feedback manipud kadagiti ospital, dialysis centers ken Philippine Society of Nephrology.
Dinakamat ti Bencom ti operations feedback iti balor a PHP4,000 nangruna ket agtultuloy ti karit dagiti dialysis providers.
