LAOAG CITY – Awan pay ti naawat nga affidavit ti Department of Justice (DOJ) mainaig iti maipagarup a panangibabawi ni dati a Bulacan First District Engineer Henry Alcantara kadagiti immuna a rakurakna.
Daytoy ket kagiddan dagiti report a maipagarup a nangipila ni Alcantara ti kontra iti salaysay no sadinno a naglikudanna ti panangawat ti kickback ken ti pannakairaman iti maanomalya a flood control projects.
Inbatad ni Department of Justice Spokesperson Atty. Polo Martinez, awan pay ti naawat wenno na-review-da nga aniaman nga affidavit manipud iti dati nga opisial ti Department of Public Works and Highways (DPWH).
Kuna ni Martinez nga awan pay ti pormal a recantation wenno panangibabawi ti rakurak nga inaramid ni Alcantara, written man wenno verbal.
Maipalagip nga immunan nga inadmitir ni Alcantara ti pannakairamanna iti nasao nga anomalya no sadinno a nangisubli isuna ti sumurok ₱100 milyon a rumrummuar a naawatna kas kickback manipud kadagiti proyekto.
