LAOAG CITY – Nagballigi dagiti kameng ti Provincial Drug Enforcement Agency ken Philippine Drug Enforcement Agency a nangtiliw iti agtawen ti 22 a lalaki a maibilang kas High Value Target Individual iti naisayangkat nga anti-illegal drug buy-bust operation iti paset ti Barangay 18 ditoy ciudad ti Laoag.
Inarestar a dagus dagiti otoridad ti suspek kalpasan a naglako ti maysa a sachet a naglaon ti maipagarop a napagango a marijuana nga agbalor iti sangaribo a pisos iti nagpammarang kas poseur buyer.
Nakupiskar pay manipod iti suspek ti maysa a pakete a naglaon metlaeng ti maipagarop a napagango a bulong ti marijuana, maysa a kaha ti sigarilyo ken ti 29,000 peso bill a boodle money.
Basar kadagiti otoridad, addan ti immuna a pannakatiliw ti suspek iti menor de edad paylaeng daytoy gapu metlaeng iti nasao nga illegal nga aktibidad isut gapuna a nagtalinaed daytoy iti Bahay-Silangan.
Nupay kasta, iti iruruwar ti suspek iti Bahay-Silangan ket maipagarop nga intuloy na manen ti illegal nga aktibidad na no sadinno nga iti daytoy a gundaway ket dakdakkelen dagiti ipatpatungpal na a transaksyon.
Naamoan a ti pagal-alaan ti suspek kadagiti ilaklako na ket manipod iti Bulacan ken iti ciudad ti Baguio, babaen ti panangipadeliver na wenno isuna a mismo ti mapan mangala kadagiti nadakamat a lugar.
Karaman met kadagiti lugar a naestablisar dagiti otoridad a paglaklakoan ti suspek iti illegal a droga ket iti ili ti San Nicolas, Sarrat, ditoy ciudad ti Laoag ken dadduma pay.
Kabayatanna, inadmitir ti pamilya ti suspek nga adda ti illegal nga aktibidad ti maseknan iti kallabes ngem mamati da a naan-anayen a nagbalbaliw daytoy.
Iti agdama ket maisagsaganan ti kaso a panaglabsing iti Republic Act 9165 wenno ti Comprehensive Dangerous Drugs Act of 2002 a maipila kontra iti nasao a suspek.
