LAOAG CITY – Natiliw ti maysa nga high value target babaen ti naiyuswat a drug buybust operation iti Brgy. Buduan iti ili ti Burgos.
Nabigbig ti suspek a ni May Joy Ravina y Biado alyas May Joy Tumaneng y Ravina, 32, awanan asawa, residente iti Brgy. Nagsurot iti nasao nga ili.
Segun kenni Police Capt. Sheryl Guzman, hepe ti PNP Burgos, nakagatang ti nagpammarang a gumatang ti iligal a druga kenni Ravina ti maysa a sachet a naglaon ti maipagarup a shabu.
Nakumpiskar pay dagiti otoridad ti uppat a sachet a naglaon ti maipagarup a shabu, maysa a sachet a naglaon ti napagango a bulong ti marijuana, ken 1000 a pisos kas marked money.
Kuna ni Guzman, saan laeng a ditoy proinsya ti operasyon ni Ravina ngem ketdi iti probinsya ti Cagayan.
Inbatad na nga adda ti dati a live-in partner ti suspek iti probinsya ti Cagayan ngem nagsina dan ken possible nga adda ti pannakainaigna iti agtultuloy a panagiwaras ti suspek iti maipawil nga agas.
Rumrumwar nga adda ti nagan ti suspek iti drug watchlist iti regional level.
