LAOAG CITY – Ibilang ti Highway Patrol Group – Ilocos Norte a manageable paylaeng ti carnapping situation ditoy probinsya.
Daytoy ti inpakaammo ni Police Major Jhonwen Balueta, ti Team leader iti Highway Patrol Group ditoy probisya.
Inbatad ni Balueta nga ita a tawen ket awan pay ti naireport wenno nairekord da a panagcarnap ditoy Ilocos Norte.
Nupay kasta, inrakurak ni Balueta nga iti napalabas a tawen ket adda dagiti naireport a carnapping incident ditoy probinsya a kaadoan ket motorsiklo ken kurung-kurong ngem narekobre metlaeng a dagus dagitoy.
Inlawlawag ni Balueta a dagiti naitaray a motorsiklo wenno kurung-kurong iti napalabas a tawen, kangrunaan na ditoy ciudad ti Laoag ket nabati ti tulbek na isut gapuna nga alisto laeng ti panangala dagiti suspek.
Malaksid iti pannakaibati ti tulbek, dagiti dadduma a suspek ket am-ammo metlaeng dagiti biktima no sadinno a buluden da ti motorsiklo ngem saan dan nga isubli pay.
Inpasigurado met ni Balueta a napilaan da amin ti kaso dagiti suspek iti panagcarnap ditoy probinsya.
Kabayatanna, kuna ni Balueta nga awan ti mamonmonitor da a dakkel a grupo wenno sindikato iti panacarnap ditoy probinsya gapu ta dagiti laeng suspek ket kaadoan kadakuada ket agkasapulan unay ti kwarta rason a naisalda wenno nailako da dagiti intaray da a motorsiklo wenno kurung-kurong.
