LAOAG CITY – Inrakurak ni Mr. Xavier Ruiz, Officer In Charge ti Ilocos Norte Tourism Office a matuloy ti pannakaisayangkat ti Himala sa Buhangin inton Sabado, Nobiembre 16.
Daytoy ti nagbalin a palawagna kalpasan nga adda dagiti impormasion nga adda ti posibilidad a maitantan ti nasao nga aktibidad gubuay kadagiti bagyo a dumupduprak ditoy probinsia.
Inpasingkedna nga awan ti kastoy a planplanoenda ken agtultuloy ti panagsaganada iti baet ti sasaaden ti panawen iti agdama.
Nupay kasta, inlawlawagna a no bilang adda ti pannakakanselarna ket dagusda nga ipakaammo iti publiko.
Maipalagip nga immunan nga inpetteng ti Ilocos Norte Tourism Office a daytoy ti umuna a tawen a maisayangkat ti naindaklan nga aktibidad iti bulan ti Nobiembre no sadinno nga iti orihinal a pannakaiyuswatna ket iti bulan ti Mayo tapno maliklikan dagiti epekto ti nalabes a kinabara ti paniempo.
Iti agdama, agtultuloy a mailaklako dagiti tickets manipud 200 a pisos agingga iti 1,500 a pisos para kadagiti residente ditoy probinsia ken dagiti turista manipud iti sabali a lugar.
Kabayatanna, naammoan a dagiti manamnama nga agbalin a bisita ket isuda Zack Tabuldo, Shanti Dope, Christian Antolin, Pipay, Queen Dure, Fhukerat, Seth Fedelin, Francine Diaz ken dadduma pay.
