LAOAG CITY – Sumango ti partner ni dati a Presidente Rodrigo Duterte a ni Honeylet Avanceña iti kaso kalpasan a maipagarop a dinangran na ti maysa a pulis kabayatan ti pannakaiyimplementar ti arrest warrant manipod iti International Criminal Court (ICC).
Daytoy ti inbatad ni Philippine National Police (PNP) spokesperson Police Brigadier General Jean Fajardo iti press conference.
Kuna ni Fajardo a nasaktan ken nagsagaba ti kamuol iti muging ti maysa a pulis a babai isut gapuna a pilaan na ti kaso a direct assault ni Avanceña.
Segun ken ni Fajardo, intuktuk ni Avanceña ti cellphone na iti muging ti nasao a pulis.
Inlawlawag na a ti nasugatan a pulis ket tumultulong laeng a mangasistir iti pannakawaknit ti pagnaan ni dati a Presidente Duterte a maarestar iti dayta a gundaway.
Kabayatanna, nagkedked paylaeng ti kampo ni Avanceña partikular ken ni dati a chief presidential legal counsel Atty. Salvador Panelo a mangipaay iti statement seknan iti nasao nga isyu.
