LAOAG CITY – Inrakurak ti Department of Health (DOH) nga awan ti panagkurang kadagiti hospital beds iti agdama para kadagiti kaso ti leptospirosis iti baet ti panagngato iti sumagmamano a lawas kalpasan ti nakaro a layus iti Luzon gubuay iti Bagyo Carina ken abagat.
Inbatad ni Department of Health Spokesperson Assistant Secretary Albert Domingo nga arig addan iti full capacity dagiti kama iti National Kidney and Transplant Institute (NKTI) ken San Lazaro Hospital kadagiti naglabas nga aldaw ngem dagus daytoy a nasolbar kalpasan a nai-refer kadagiti dadduma nga ospital dagiti pasiente.
Immunan nga inbilin ti Department of Health ti panangkita ti surge capacity plan dagiti ospital iti National Capital Region gapu iti panagngato ti bilang dagiti kaso ti leptospirosis.
Naammoan nga adda ti 1,444 a kaso ti leptospirosis ti nairekord ita a tawen sipod idi Enero 1 agingga Hulyo 27 no sadinno nababbaba ti 42% maidasig iti 2,505 a kaso iti kapada a panawen iti napalabas a tawen.
