LAOAG CITY – Kalikagum ni House Committee on Justice nga iparang ni Vice Pres. Sara Duterte ni Mary Grace Piattos ken dadduma pay a mapagat-atapan a nagan a maipagarup a recipients ti confidential funds.
Inbatad ni Committee Chair ken Batangas 2nd District Rep. Gerville Luistro, saan pay a nailawlawag ni Vice President Sara ti isyu maipanggep ken ni Mary Grace Piattos idi immuna daytoy a naidatag iti imbestigasion ti Kamara de Representantes idi 19th Congress.
Rumrummuar a ni Mary Grace Piattos ket karaman iti 1,300 a maipagarup a peke a nagan a recipients ti confidential funds ni Vice President Sara nga awan ti rekordna iti Philippine Statistics Authority (PSA).
Kuna ni Luistro, mabalin a paayaban ti Justice panel ni Ramil Madriaga, dati nga Intelligence Officer ti militar ken maipagarup a bagman ni Vice President Sara iti mini trial ti komite.
