LAOAG CITY – Pinaayaban ti House Committee on Justice ni dati a senador Antonio Trillanes IV ken dagiti opisial ti Anti-Money Laundering Council (AMLC) mainaig kadagiti transaksion iti bangko ni Vice President Sara Duterte iti agtultuloy a panagdengngeg iti impeachment inton sumaruno a lawas.
Inaprobaran ti Justice panel nga idadauloan ni Batangas 2nd District Rep. Gerville Luistro ti mosion ni Mamamayang Liberal (ML) Partylist Rep. Leila de Lima a mangiyisyu ti subpoena adtestificandum ken ni Trillanes ken kadagiti opisial ti Anti-Money Laundering Council.
Ni Trillanes ket maipagarup nga adda dagiti ammona kadagiti dokumento kadagiti bank accounts ni dati a Presidente Rodrigo Duterte ken ti pamiliana pakairaman ni Vice President Duterte.
Nakiddaw a paayaban ti Anti-Money Laundering Council nga agatendar iti panagdengngeg inton Abril 22 ken isubmitir dagitoy a report kadagiti transaksion iti bangko ni Vice President Sara ken ti mister daytoy a ni Atty. Manases Carpio manipud 2006 agingga 2025 a sinita ti bangko.
