LAOAG CITY – Inpasigurado ni House Deputy Speaker ken La Union Rep. Paolo Ortega nga itultuloy ti panagdengngeg ti House Committee on Justice mainaig iti impeachment kontra ken ni Vice President Sara Duterte iti baet kadagiti petision nga inpasa iti Korte Suprema.
Inbatad ni Ortega, saan nga otomatiko a malappedan dagiti petision ti proseso agingga nga awan ti pammilin ti Korte Suprema kas ti temporary restraining order.
Inpettengna a sumursurot ti komite iti Konstitusion, House rules ken ebidensia.
Inlawlawagna nga agtultuloy ti panagdengngeg basar iti schedule kas paset ti pammilin ti Kamara de Representantes ken tapno maikkan ti gundaway ti Bise Presidente a mangikalintegan ti bagina.
Inpaganetget ni Ortega a ti proseso ket nakasentro iti due process ken patas a panagdengngeg para iti amin a takder.
