LAOAG CITY – Inaramat ti House Prosecution panel ti naitantan a dua nga aldaw ti trial day gapu iti saan a napintas a sasaaden ti panawen, tapno sublianan ken tingitingen dagiti ebidensia, testimonia ken dadduma pay nga iggemda nga impormasion kontra ken ni Vice President Sara Duterte.
Segun ken ni panel adviser ken dati a Rep. Ace Barbers, saan a nagbalin a lapped ti saan a napintas a sasaaden ti panawen tapno tingitingen ti panel dagiti kaso kontra iti Bise Presidente.
Innayon pay ti dati nga agpanpanday linteg a no pay dua nga aldaw ti nasayang iti trial, nagbalin a produktibo ti panel.
Iti baet dagiti pannakakanselar dagiti trial, namnamaen ti House panel ti pannakaipaalisto ti garaw ti panagusig kontra iti Bise Presidente.
Gapu iti daytoy, napagsasaritaan ti House ti posibilidad ti panangnayun ti maysa pay nga aldaw iti manarimaan a tallo nga aldaw iti kada lawas nga iskedyul.
Mamati ti dati nga agpanpanday linteg a no pay manayunan ti trabaho dagiti Senador ken dagiti miembro ti agsinnumbangir a partido, ket makatulong daytoy para iti pannakaipaalisto ti kaso.
