LAOAG CITY – Nalawag para ken ni House Quad Committee overall chairman ken Surigao del Norte Representative Robert Ace Barbers a ti agtultuloy a panaglemlemmeng ni Atty. Harry Roque ket tapno malappedan ti pannakaibutaktak ken mapaneknekan ti maipagarup a pannakairamanna iti iligal a Philippine Offshore Gaming Operators (POGO).
Inbatad ni Barbers nga awan ti political persecution ken ni Roque isu nga awan ti pangibasaran ti kidkiddawenna nga asylum idiay The Netherlands.
Inlawlawagna a ti contempt ken arrest order ti House of Representatives ken ni Roque ket gapu iti panagkedked daytoy nga isubmitir iti quad comm dagiti dokumento a mabalin a maikonektar kenkuana iti iligal nga operasion ti Philippine Offshore Gaming Operators.
Innayonna a ti contempt ken arrest order ti Kamara ken ni Roque ket maawan ti bileg daytoy apaman nga agngudo ti 19th Congress inton Hunio 30, 2025.
