LAOAG CITY – Idaulwan ni House Speaker Ferdinand Martin Romualdez ti pannakaiyuswat ti imbestigasyon mainaig iti nangato a presyo dagiti magatgatang iti baet ti panagbalin a nababa ti farm gate price.
Aramiden daytoy ni Romualdez iti panaglukat ti sesyon iti kamara de representantes intono Abril 29 ita a tawen.
Inrakurak daytoy ni Romualdez kalpasan a nakitaripnong da ken ni Deputy Majority Leader Erwin Tulfo kadagiti mangibagbagi ti producer, retailer, ken grocery stores mainaig iti nangato a presyo dagiti magatgatang.
Segun ken ni Speaker Romualdez, kiniddaw na ken ni Rep. Mark Enverga, Chairman ti Committee on Agriculture nga idaulwan na ti imbestigasyon seknan iti nasao a banag.
Iti naiyuswat a taripnong, inbata ni Jayson Cainglet, ti Samahang Industriya ng Agrikultura (SINAG) a ti farm gate price ti bagas, manok, baboy, ken uray ti sibuyas ket saan a naggaraw iti napalabas a tallo a bolan isut gapuna nga awan ti rumbeng a panagngato ti presyo daytoy.
Nagkari ni Speaker Romualdez nga usaren ti kamara de representantes ti oversight function na tapno mabukitkitan ti isyu ken makaaramid ti linteg tapno ad-adda pay a maprotehiran dagiti aggatang kontra kadagiti mananggundaway.
Nagpanawagan pay ni Romualdez kadagiti stakeholder a makipaset kadagiti diskusyon tapno makaaramid ti maiyannatop a pagannurutan ken maipababa ti presyo dagiti magatgatang.
