LAOAG CITY – Nagpanawagan ni House Speaker Martin Romualdez kadagiti rice traders a kissayan ti kinagamrud da ken tulungan ti Marcos administration tapno maalay-ayan ti sitwasyon ti panagbiag dagiti pamilya a Pilipino.
Daytoy ket kalpasan nga adda dagiti report nga agtultuloy ti pananggundaway dagiti hoarders iti sitwasyon tapno ngumato manen ti presyo ti bagas iti merkado.
Immuna iti daytoy, indaulwan ni Speaker Romualdez ti naiyuswat nga inspeksyon iti sumagmamano a dadakkel a rice warehouse iti Bulacan kadwa na ti fact-finding mission ti Bureau of Customs.
Iti nasao nga inspeksyon ket napaneknekan nga adda dagiti mapaspasamak nga hoarding iti bagas.
Segun ken ni Speaker Romualdez, kaadoan kadagiti suplay a bagas ket umabot agingga iti tallo a bolan ngem ti rumrumuar ket hoarding.
Inpetteng ni Speaker Romualdez a no ma-hoard ti suplay ket kapilitan a ngumato ti presyo ti bagas.
Innayon ni Romualdez a basar iti assessment da ket adda ti umdas a suplay a bagas kangrunaan na dagiti naangkat manipod iti sabali a pagilyan ngem uray dagitoy ket ngimmato metten ti presyo da.
Inpalgak ni Romualdez a no sumangpet dagiti inangkat a bagas ket masapol nga iparuk-at a dagus iti merkado.
Kabayatanna, nagpanawagan pay ni Romualdez ken ni Rice Czar Undersecretary Leocadio Sebastian ti Department of Agriculture nga agaramid ti addang tapno saanen a ngumato pay ti presyo ti bagas nga isu ti kangrunaan a kalikagom ni Presidente Marcos.
Immunan nga inpetteng ni Rep. Mark Enverga a ti rice hoarding ket maibilang a panangsabotahe ti ekonomiya.
