LAOAG CITY – Saan nga inmannamong ti Commission on Elections (Comelec) iti singasing seknan iti hybrid poll system para iti 2025 midterm elections.
Iti palawag ni Commission on Elections chairperson George Erwin Garcia, ti singasing ket mabalin a mangdalapus dagiti pagannurutan ti Election Automation Law a mangtigtignay iti automated method para iti eleksyon.
Nakailanad pay iti nasao a linteg a ti automated election system ti mausar kadagiti sumaruno a national ken local elections ken ti naiyalokar a pondo ket para laeng iti automated election.
Kinuna pay ni poll body chief nga iti babaen ti hybrid method, ket umabot iti sumagmamano pay nga aldaw sakbay a malpas ti panagbilang iti botos.
Daytoy ti inpablaak ti opisyal kalpasan a ginutigut ti poll watchdog ti Kontra Daya idi Huwebes Hulyo 11 ti Commission on Elections nga ikonsidera ti panagusar ti hybrid election system inton umay a tawen kalpasan a kwinestyunaran ti P17.9 billion poll automation contract iti South Korean firm ti Miru Systems.
