LAOAG CITY – Immanugot ti International Criminal Court (ICC) Pre-Trial Chamber 1 a maiyalud-od pay ti deadline iti panagisumitir kadagiti dokumento nga adda ti pakainagan dagiti testigo iti kaso ni dati a Presidente Rodrigo Duterte.
Iti 5 a pinanid a desisyon a napetsaan ti Mayo 20 a pinirmaan ni Presiding Judge Iulia Antoanella Motoc, inbilin na iti prosekusyon a makumpleto ti disclosure ti arrest warrant materials nga adda ti pakainaigan dagiti testigo a saan a lumabes iti Hulyo 1 kas maiyataday iti request ti prosekusyon.
Naamoan nga intono Hunyo 16 ti deadline ti prosecution tapno agsumitir ti aniaman nga aplikasyon para iti redaction dagiti pakabigbigan dagiti testigo wenno non-disclosure ti sibubukel nga items ti ebidensiya ken deadline para iti Victims and Witness Units tapno agsumitir kadagiti obserbasyon da kadagiti nasao nga aplikasyon.
Naituding met intono Hunyo 20 a deadline para iti panagisumitir iti aniaman a sungbat nga adda ti pakainaigan kadagiti nadakamat a submissions.
Intono Hulyo 1 ti deadline ti prosekusyon tapno makumpleto ti disclosure ti Arrest Warrant Materials nga adda ti pakainaigan dagiti testigo kadagiti kiniddaw da a request.
Maipalagip nga idi Mayo 9, nangipatulod ti prosekusyon kadagiti baro a dokumento nga adda ti pakainaigan iti arrest warrant ngem nagkiddaw met daytoy ti sabali deadline tapno i-disclose dagiti nabatbati a materyal.
Inbatad ti Pres-Trial Chamber a saan met a kinontra daytoy ti defense team ti dati a presidente.
