LAOAG CITY – Inlawlawag ti International Criminal Court (ICC) a nagtalinaed a nakabalud ni dati a Presidente Rodrigo Duterte iti The Hague, Netherlands.
Daytoy ket kalpasan nga inpalubos ti International Criminal Court Pre-Trial Chamber I iti kampo ti dati a presidente nga itantan ti panagdesisyon iti interim release wenno temporaryo a pannakawaya-waya na.
Inparuk-at a mismo ti International Criminal Court Public Information and Outreach Section ti nasao a palawag.
Maipalagip a nasuroken nga uppat a bolan a nakabalud ti dati a Presidente iti detention facility ti International Criminal Court sipud naarestar idi Marso 11 ita a tawen gapu iti maipagarop a crimes against humanity mainaig kadagiti napasamak a pammapatay iti babaen ti war on drugs ti napalabas nga administrasyon.
