LAOAG CITY – Inbilin ti Pre-Trial Chamber I ti International Criminal Court (ICC) ti prosecution ken ti defense team ni dati a Presidente Rodrigo Duterte nga isagana dagiti ebidensiada inton sumaruno a bulan.
Iti pammilin, nasken a ti dua a grupo ket isaganadan ti aniaman a klase ti ebidensia a planoda nga iprisentar.
Inton Abril 4, 2025 ket maisubmitir dagiti impormasion kadagiti naisubmitir nga ebidensia no mano dagiti saksi ken dagiti salaysay dagitoy para iti biang dagiti prosecutors.
Iti kampo met ni Duterte ket addaanda agingga inton Abril 11 tapno isubmitir ti obserbasionda iti impormasion nga insubmitir ti prosecution.
Sungbatanda no agiprisentar ti ebidensia wenno tumawag dagiti bukudda a saksi iti maiyuswat a confirmation hearing inton Septiembre.
Maipapan iti partisipasion dagiti biktima ket inikkan ti International Criminal ti Registry ti agingga iti Abril 2, 2025 a mangipila ti obserbasion nga adda ti pakainaiganna iti aplikasion dagiti biktima iti pannakipasetda.
Karaman ditoyen ti admission proceedings, proof of identity documents ken legal representation iti agdama a proceedings.
Maipalagip a basar iti police records ket adda ti innem a ribu nga indibidual ti pimmusay iti drug war ngem basar iti human rights groups ket dumanon iti 30 a ribu ti natay pakairamanan dagiti vigilante killings.
Immunan nga inrakurak ni Duterte a nakasagana daytoy a sangoenna ti amin a kaso nga ibatbatoda kenkuana ken inpetteng ti abugadona a ni Nicolas Kaufman nga iligal ti panangarestar iti dati a Presidente.
