LAOAG CITY – Kiniddaw ti Office of the Prosecutor ken ti Office of Public Counsel for Victims (OPCV) iti International Criminal Court (ICC) Appeals Chamber nga ibasura da ti apela ti kampo ni dati a Presidente Rodrigo Duterte a mangkukwestyun iti hurisdiksion ti ICC iti kasona.
Maibasar iti pleading a pinirmaan ni Deputy Prosecutor Mame Mandiaye Niang, inbatad ti Office of the Prosecutor a rumbeng nga ibasura ti ICC Appeals Chamber ti apela gapu ta napaay a mangipaneknek nga adda ti biddut iti desision iti pannakabaliktad ti kaso.
Inbatad na a saan nga umiso ti grounds of appeal ti legal team ni Duterte ken rumbeng nga agtultuloy ti panagdengeg.
Insubmitir met ti Office of Public Counsel for Victims ti umasping a sungbat iti apela nga inpila ti kampo ni Duterte.
Dinakamat ni Office of Public Counsel for Victims Principal Counsel Paolina Massidda a ti Article 127 (2) ti Rome Statute, a mangibagbaga a ti panagikkat ti Pilipinas iti Rome Statute ket saan a manglapped iti panagimbestigar ti ICC gapu ta nangrugi ti kaso idi miembro pay laeng ti Pilipinas.
Maipalagip a kiniddaw idi ti legal team ni Duterte iti International Criminal Court a baliktaden ti desisyon gapu iti isyu ti hurisdiksyon no sadinno awan ti legal a pagibasraan da ta saanen miembro ti Pilipinas.
Iti agdama, nakabalud ni Duterte iti International Criminal Court gapu iti kampania na iti war on drugs sipud pay idi mayor ti ciudad ti Davao ken Presidente ti Pilipinas.
