LAOAG CITY – Kinumpirmaran ti Independent Commission for Infrastructure (ICI) nga adda ti pundo ti Komision.
Inbatad ni Independent Commission for Infrastructure Executive Director Atty. Bryan Keith Hosaka, nairuaren ti Budget Department ti Notice of Cash Allocation.
Inbatad ni Hosaka a makikoordinarda laengen iti Landbank of the Philippines no mabalinen nga usarden ti Independent Commission for Infrastructure ti pundo.
Inlawlawagna a ni Chairman Andres Reyes Jr. ken ti dua a miembro ti Komision ket saan nga umaw-awat ti sueldo.
Kunana a per diems ken allowances laeng ti aw-awaten dagitoy kas maiyallubog iti maipatpatungpal a linteg ken pagannurotan.
Maipalagip a kinumpirmaran ti Malacañang a nabayagen nga inpaay ti Department of Budget and Management (DBM) iti Independent Commission for Infrastructure (ICI) ti P41-milyon a pundo daytoy.
Immuna iti daytoy, adda ti rimmuar nga alegasion a ti kinaawan ti pundo ti Komision ti sumagmamano kadagiti nagbalin a rason ti panagikkat ni dati nga Independent Commission for Infrastructure Commissioner Rogelio “Babes” Singson.
