LAOAG CITY – Kinumpirmaran ni Barangay Chairwoman Val Rarangol iti Barangay Nagpatpatan, Solsona, Ilocos Norte nga adda ti natakwatan dagiti barangay tanud na a nangiyuswat iti illegal a panagkalap wenno nagkuryente ti lames iti mismo a barangay da ngem nakataray dagiti maseknan.
Binigbig ni Rarangol dagiti nagkuryente ti lames a ni Randy Tomas, naikamang iti Sitio Caaplasan ken ti binigbig na laeng nga anak ti Eric manipod iti ili a Dingras.
Inbatad ti opisyal a basar iti impormasyon kenkuana, kanayun ti panagkuryente dagiti maseknan iti karayan da ngem awan ti makaitured nga agisuplong kenkuana kangrunaan na dagiti otoridad.
Gapu ti daytoy, inkari ni Rarangol a mapan da ireport ti PNP dagiti maseknan ken paayaban danto dagitoy.
