LAOAG CITY – Maysa laengen ti Ilocos Norte kadagiti probinsya ditoy Mainland Luzon ti nagtalinaed nga African Swine Fever Free.
Daytoy ti inpasingked ni Dr. Loida Valenzuela, Provincial Veterinarian.
Inbatadna nga itay laeng kallabes ket adda ti nairakurak a kaso ti ASF iti Apayao, Kalinga ken Abra.
Kunana a nakasaritanan ti Municipal Agriculturist iti ili ti Solsona para ti naiget a monitoring iti border kalpasan a naduktalan a positibo ti ASF dagiti natay nga alingo idiay Kalinga ken Apayao.
Inbunannagna nga agtultuloy met ti panagala ti Provincial Veterinary Office ti “laboratory samples” kadagiti “hog farm”kas paset ti panangisaysayangkatda ti “surveillance activities”.
Segun kenkuana, daytoy ti pammaneknek a ti probinsia ket nagtalinaed nga “ASF free”.
Kunana nga iti agdama ket tumultulong ti Metro Ilocos Norte Council wenno MINC a mangisigurado nga awan ti maiserrek ditoy probinsia a karne wenno naiproseso a produkto manipud iti karne ti baboy a naapektaran ti ASF.
Malaksid iti daytoy, imbatad ni Valenzuela a nakiddaw payen ti tulong dagiti Local Government Units iti nadumaduma nga ili ken siudad ditoy probinsia babaen iti panangireportda a dagus kadagiti agsursursur nga aggatgatang ti baboy manipud iti sabali a lugar.
Iti agdama, maibilang ti Ilocos Norte iti Protected Zone wenno ASF Free Zone.
