LAOAG CITY – Karaman ti probinsya nga Ilocos Norte kadagiti finalist ti National Tourism Awards a maisayangkat iti ili ti Paoay intono Biyernes, Oktubre 4, 2019.
Segun kenni Provincial Tourism Officer Mr. Ianree Racquel, daytoy ti kangrunaan a paset ti National Convention ken ado dagiti pammadayaw nga agur-uray kadagiti nasurok sangaribo a tourism officers manipud iti nagduduma a lugar ditoy pagilyan pakairamanan ditoy probinsya.
Mangnamnama ni Racquel a magun-od ti Ilocos Norte ti pammadayaw nupay naiget ti panagbibinnalubal.
Inbatad na a napintas met nga inominar dagiti dadduma pay a lugar kas iti Misamis Oriental, Samar ken Quirino province a daytoy met ti ummuna a gundaway a makipagpaset dagiti nadakamat a probinsya.
Mainaig iti daytoy, manamnama met nga agatendar dagiti opisyal manipud Department of Tourism ken dagiti regional officials.
Naamoan a dagiti dadduma pay nga aktibidad ket maiyuswat iti Fort Ilocandia ken Plaza de Norte ditoy ciudad.
Maipalagip a nagun-od ti Ilocos Norte ti Tourism Oriented Province iti napalabas a tawen.
