LAOAG CITY – Inpakammo ni Ms. Bernadette Abubo, ti Defense officer II iti Office of the Civil Defense Region 1 a karaman ti Ilocos Norte kadagiti turungen dagiti personnel ti Philippine Institute of Volcanology and Seismology kalpasan ti magnitude 6.4 a gingined idi rabii ti Martes.
Segun kenni Abubo, ditoy probinsya, iti Ilocos Sur ken Abra ti bisitaen dagiti personnel ti Phivolcs tapno adalen no anya ti makaigapo ti gingined.
Kunana a nadakamat dagiti maseknan a personnel bayat ti kaadda da iti Emergency Operation Center ti Office of the Civil Defense nga agsasanga ti fault line iti Northern Luzon.
Inlawlawag na a ti kangrunaan a mabanbantayan ita a probinsya kalpasan ti magnituse 6.4 a gingined ket ti Ilocos Norte ken llocos Sur gapo kadagiti ado nga aftershocks.
Inbatad na nga adda ti makunkuna nga stress transfer no sadinno a no adda ti nagkuti a maysa a parte ti fault line ket mabalin met nga aggaraw ti kaasideg na.
Kunana pay a basar iti Phivolcs, maysa kadagiti kangrunaan a rason no apay a napigsa ti gingined iti Northern Luzon ket gapo iti presensya dagiti ado a fault line.
Mainaig iti daytoy, binalakadan ni Abubo ti publiko nga umadayo pay laeng iti kabaybayan, iti laksid nga awan ti pangta iti tsunami.
