LAOAG CITY – Kumpirmado a ti Ilocos Norte ti agbalin a host ti pre-national qualifying meet ti Palarong Pambansa.
Inpakaammo ni Mr. Gene Reginaldo, Education Program Supervisor ken Division Sports Officer ti Department of Education Division of Ilocos Norte a napagnunumoanda iti panagtataripnongda kada Gob. Matthew Marcos Manotoc no ania ti maitulong ti gobierno probinsial ti Ilocos Norte wenno PGIN iti panag-host ti probinsia iti nadakamat nga event.
Inlawlawagna a napagsasaritaan pay iti nasao a taripnong ti lugar a pakaipanan dagiti delegado iti nasao nga event ken ti pakaisayangkatan dagiti paay-ayam.
Inbatadna nga uppat dagiti rehion nga aglalaban iti Ilocos Norte a pakaibilangan ti rehion uno, dos, tres ken ti Cordillera Administrative Region.
Segun ken ni Reginaldo, sangapulo ket uppat dagiti events a mapaglalabanan ditoy probinsia ken dagiti top two iti kada event ti kualipikado iti Palarong Pambansa. Inpalgakna a dagiti nangabak iti individual events iti kallabes a Region One Athletic Association meet ket nakastrekda a dagus dagitoy iti Palarong Pambansa.
Kabayatanna, inpakaammona a maisayangkat ti pre national qualifying meet iti masungad a Hulio dies y siete ken agpatingga iti Hulio beinte uno.
